الحیات نیوز سروس 

رانچی،21؍مئی: وزیر اعلیٰ ہیمنت سورین اور ایم ایل اے کلپنا سورین نے جھارکھنڈ اسٹیٹ موومنٹ کے ممتاز رہنما اور سابق ایم ایل اے آنجہانی درگا سورین کو ان کی برسی کے موقع پر دلی خراج عقیدت پیش کیا۔ اس موقع پر دونوں رہنما رانچی کے نامکوم (لواڈیہہ) واقع درگا سورین میموریل پہنچے۔ وزیر اعلیٰ ہیمنت سورین نے آنجہانی کو خراج عقیدت پیش کیا۔ انہوں نے درگا سورین کے مجسمے پر پھول چڑھا کر انہیں خراج عقیدت پیش کیا اور جھارکھنڈ تحریک میں ان کے تعاون کو یاد کیا۔ انہوں نے کہا کہ درگا سورین نہ صرف ایک سرشار عوامی رہنما تھے بلکہ انہوں نے ساری زندگی قبائلی سماج کے حقوق کے لیے بھی جدوجہد کی۔کلپنا سورین نے بھی انہیں خراج عقیدت پیش کیا اور کہا کہ درگا سورین کی زندگی آنے والی نسلوں کو جدوجہد اور خدمت کی ترغیب دیتی رہے گی۔ اس موقع پر جھارکھنڈ مکتی مورچہ کے کئی کارکنان اور مقامی لوگ بھی موجود تھے۔