الحیات نیوز سروس 

رانچی،22؍دسمبر:انڈیااتحاد نے جھارکھنڈ میں احتجاجی مارچ کیا۔ کانگریس سمیت تمام آئینی جماعتوں نے پارلیمنٹ کی حفاظت میں کوتاہی اور ارکان پارلیمنٹ کی معطلی کے خلاف اس احتجاجی مارچ میں اپنی موجودگی درج کرائی۔ یہ احتجاجی مارچ شہید چوک سے شروع ہو کر راج بھون پہنچا۔ اس موقع پر ریاستی کانگریس کمیٹی کے صدر راجیش ٹھاکر نے کہا کہ اس احتجاجی مارچ کا مقصد عوام کی توجہ ہماری جمہوریت کو درپیش خطرناک صورتحال کی طرف مبذول کرانا ہے۔ انہوں نے کہا کہ سوال یہ ہے کہ نوجوانوں نے پارلیمنٹ میں احتجاج کیوں کیا؟ انہوں نے یہ قدم بے روزگاری کے خلاف احتجاج میں اٹھایا۔ ملک کے دیگر نوجوانوں کا بھی یہی حال ہے۔ کیونکہ یہ ہر سال 2 کروڑ نوجوانوں کو روزگار دینے کا وعدہ کرکے اقتدار میں آئی تھی۔ مودی حکومت انہیں روزگار فراہم نہیں کر پا رہی ہے۔انہوں نے کہا کہ آزاد ہندوستان کی تاریخ میں یہ پہلا واقعہ ہے جب اپوزیشن کے 146 ارکان پارلیمنٹ کو معطل کیا گیا۔ یہ جمہوریت پر دھبہ ہے۔ ملک کی قومی بدنامی ہے۔ کیونکہ ہندوستان جمہوریت کی ماں ہے۔ انہوں نے کہا کہ مودی حکومت نے پارلیمنٹ کے وقار اور جمہوریت کے وقار دونوں کو ایک طرف رکھ دیا ہے۔ پارلیمنٹ کو حکمران جماعت کا اکھاڑا بنانے کی سازش کی جا رہی ہے۔اپنے خیالات کا اظہار کرتے ہوئے نمائندوں نے کہا کہ مودی سرکار نے آئین، جمہوریت اور پارلیمنٹ کو خطرے میں ڈال دیا ہے۔ پارلیمنٹ کی سیکیورٹی لیپس پر حکمران جماعت خاموش ہے اور اپوزیشن ارکان کے خلاف کارروائی کی جارہی ہے۔ راجیش ٹھاکر نے کہا کہ مودی حکومت نہیں چاہتی کہ ایوان چلے۔ جمہوریت میں عوام کے مسائل پر سوالات ہونے چاہئیں۔ ہم تمام اپوزیشن لیڈر اور کارکن ایک ساتھ کھڑے ہیں، یہ نفرت اور محبت کی لڑائی ہے۔ جتنی نفرت پھیلائیں گے، اتحاد اتنا ہی پیار پھیلے گا۔

وزیر خزانہ ڈاکٹر رامیشور اورائوںنے کہا کہ وزیر اعظم اور وزیر داخلہ کو پارلیمنٹ کی سیکورٹی میں کوتاہی پر ایوان میں بیان دینا چاہیے۔ یہ جمہوریت کا عمل ہے۔ انہوں نے کہا کہ بیان نہ دینا ایوان کی توہین ہے۔ ریاستی کانگریس کے ورکنگ صدر بندھو ترکی نے کہا کہ بی جے پی ملک میں کثیر الجماعتی جمہوریت نہیں چاہتی۔ انہوں نے کہا کہ سوال یہ ہے کہ پارلیمنٹ میں سیکورٹی لیپس کیسے ہوئی؟ وزیر زراعت بادل پترالیک نے کہا کہ نوجوان پارلیمنٹ میں کیسے پہنچے اور جن کی سفارش پر پارلیمنٹ پہنچے ان کے خلاف کارروائی کیوں نہیں کی جا رہی ہے۔ اس سے بی جے پی کے ارادوں اور پالیسیوں کو صاف ظاہر ہوتا ہے۔