الحیات نیوز سروس 

ہزاری باغ،09؍مارچ:ہزاری باغ میں ہولی کی رات دو گروپوں کے درمیان پرتشدد تصادم ہوا۔ اس تصادم میں دونوں اطراف کے لوگ زخمی ہوئے جبکہ برہی کے ایس ڈی پی او نذیر اختر سمیت نصف درجن پولیس اہلکاروں کے زخمی ہونے کی بھی اطلاعات ہیں۔ دونوں طرف سے پتھراؤ کا سلسلہ جاری ہے۔ اس میں 10 افراد کے زخمی ہونے کی خبر ہے۔ پولیس نے معاملے کو ختم کرنے کے لیے ہلکی طاقت کا بھی استعمال کیا۔ سیکورٹی وجوہات کی بنا پر جے اے پی کے جوانوں کو گاؤں بھیجا گیا ہے۔ پورے علاقے میں سکیورٹی کے سخت انتظامات کیے گئے ہیں، پورا علاقہ پولیس کیمپ میں تبدیل ہو گیا ہے۔ علاقے میں غیر اعلانیہ کرفیو نافذ کر دیا گیا ہے۔اس معاملے میں کچھ لوگوں کو گرفتار کیا گیا ہے۔ موقع سے ایک دیسی پستول اور گولہ بارود بھی برآمد ہوا ہے۔ علاقے میں حالات بدستور کشیدہ ہیں تاہم سیکیورٹی کے پیش نظر علاقے میں پولیس کی نفری تعینات ہے جس کی وجہ سے حالات قابو میں ہیں۔ہولی کے دن علاقے کے لوگ بیٹھ کر تاش کھیل رہے تھے۔ اسی دوران گاؤں کے کچھ لوگ پہنچ گئے اور انہیں رنگ دینے لگے۔ دونوں فریقوں میں جھگڑا ہوا۔ معاملہ اتنا بڑھ گیا کہ بات لڑائی تک پہنچ گئی۔ لڑائی کے بعد شدید پتھراؤ اور پرتشدد جھڑپیں شروع ہوگئیں۔ دونوں طرف سے ہتھیار نکل آئے۔ ایس ڈی پی او نذیر اختر کو اضافی پولیس نفری کے ساتھ موقع پر پہنچنا پڑا۔معاملہ رفع دفع کرنے کی کوشش میں پولیس بھی تصادم کا نشانہ بن گئی۔ شدید پتھراؤ میں ایس ڈی پی او بھی زخمی ہو گئے۔ نصف درجن پولیس اہلکار زخمی بھی ہوئے۔ جے اے پی کے جوان پورے علاقے میں ڈیرے ڈالے ہوئے ہیں۔