الحیات نیوز سروس 

رانچی،10؍جون:وزیر صحت ڈاکٹر عرفان انصاری نے کہا کہ وزیر اعلیٰ ہیمنت سورین نے جھارکھنڈ کو 'منشیات سے پاک مہم‘ کا پیغام دیا ہے، انھوں نے ہندوستان کو منشیات سے پاک بنانے کا عہد کیا ہے اور ہم ان کے عزم کو پورا کرنے کے لیے دن رات کام کر رہے ہیں۔ اس کے تحت یہ نشہ چھڑانے کی مہم چلائی جا رہی ہے، جس کا آغاز 10 جون سے ہوا ہے اور اس کا  اختتام  26 جون کو مورہ آبادی گراؤنڈ میں منعقد ہوگا۔ اس کے تحت یہ ورکشاپ بھی منعقد کی جارہی ہے۔ انہوں نے کہا کہ تمام اضلاع میں بیداری  لانے کے مقصد سے بیداری مہم کی گاڑیاں بھی روانہ کی جا رہی ہیں جو تمام اضلاع میں جا کر لوگوں کو منشیات کے مضر اثرات سے آگاہ کریں گی۔ ڈاکٹر انصاری منگل کو پروجیکٹ بھون میں نشہ چھڑانے کی مہم کے تحت منعقدہ ورکشاپ سے خطاب کر رہے تھے۔ اس موقع پر انہوں نے محکمہ داخلہ اور انفارمیشن پبلک ریلیشنز کے تعاون سے تیار کردہ منشیات کے استعمال سے متعلق کتابچہ بھی جاری کیا، اس کے ساتھ ورکشاپ میں موجود افسران اور ملازمین بشمول وزیر صحت ڈاکٹر عرفان انصاری نے ہندوستان کو منشیات سے پاک بنانے کا حلف لیا۔ پروگرام کے بعد ڈاکٹر انصاری نے مہم کی گاڑیوں کو بھی جھنڈی دکھا کر روانہ کیا۔

وزیر صحت نے کہا کہ پروگرام کا بنیادی مقصد نوجوانوں اور عوام کو نشے کی لت سے نکالنا ہے۔ یہ مہم آج سے شروع ہو رہی ہے۔ مہم کے تحت تمام اضلاع میں تشہیری گاڑیاں جائیں گی، اسکولوں اور کالجوں میں بیداری  پروگرام چلائے جائیں گے۔ جھارکھنڈ کے مختلف اضلاع بالخصوص رانچی، کھونٹی میں افیون کی کاشت روکنے کے لیے کارروائی کی گئی ہے۔ انہوں نے کہا کہ ممنوعہ ادویات کے غلط استعمال کو روکنا بہت ضروری ہے۔ ہماری کوششیں جاری ہیں اور ہم اسے کافی حد تک روکنے میں کامیاب بھی ہوئے ہیں لیکن ہمارا مقصد افیون کی کاشت کو مکمل طور پر ختم کرنا ہے۔ افیون کی کاشت کو بڑے پیمانے پر تباہ کیا گیا، یہ حکومت کا کارنامہ ہے۔ منشیات کی لت لوگوں کو سماجی، ذہنی اور معاشی طور پر تباہ کر رہی ہے۔

ڈاکٹر عرفان انصاری نے کہا کہ ریاست کے 10,134 میڈیکل اسٹوروں میں سے 4,000 سے زیادہ اسٹوروں میں سی سی ٹی وی نصب  کیے گئے ہیں، باقی میں اسے لگانے کا عمل جاری ہے۔ جھارکھنڈ میں زیادہ تر نوجوان منشیات کی لپیٹ میں ہیں۔ ہمیں جھارکھنڈ کے لوگوں کو نشے کے چنگل سے نکالنا ہے۔ انہوں نے گٹکا کھانے کے مضر اثرات کے بارے میں بتایا۔ انہوں نے کہا کہ لوگوں کو نشے کے مضر اثرات سے آگاہ کرنے کی ضرورت ہے۔

ڈاکٹر عرفان انصاری نے کہا کہ ہم جلد ہی جھارکھنڈ کو RIMS 2 تحفے میں دینے جا رہے ہیں۔ اس کے ساتھ یہاں 6 نئے میڈیکل کالج اور 2 ٹیسٹنگ لیبز بھی کھلیں گی۔ تاکہ یہاں کے لوگوں کو باہر علاج کروانے کی پریشانی نہ ہو۔ انہوں نے کہا کہ نشہ تمام بیماریوں کی جڑ ہے، نوجوان کم عمری میں نشے کے جال میں پھنس کر اپنی زندگیاں برباد کر رہے ہیں۔ ہمیں انہیں آگاہ کرنا ہوگا۔ یہ صرف 14 دن کا پروگرام نہیں ہے بلکہ یہ پروگرام پورے سال چلنا چاہیے۔ میڈیا سے گزارش ہے کہ وہ آگاہی مہم پر توجہ دیں اور لوگوں کو بھی آگاہ کریں۔(باقی صفحہ 3پر)