نئی دہلی/لکھنؤ،11؍مئی(ایجنسی) وزیر دفاع راجناتھ سنگھ نے ہفتے کے روز ویڈیو کانفرنسنگ کے ذریعے لکھنؤ میں برہموش ایرو اسپیس کی انٹیگریشن اور ٹیسٹنگ سہولت کا افتتاح کیا۔ اس موقع پر انہوں نے کہا کہ میرا خواب تھا کہ میرا شہر لکھنؤ ہندوستان کے دفاعی شعبے کو مضبوط بنانے میں اہم کردار ادا کرے اور آج وہ خواب پورا ہو رہا ہے۔راجناتھ سنگھ نے 'آپریشن سندور‘ کے لیے ہندوستانی فوج کی تعریف کرتے ہوئے کہا کہ جن دہشت گرد تنظیموں نے ہندوستانی خاندانوں کو غمزدہ کیا، ان کے خلاف کارروائی کر کے فوج نے انصاف دلایا۔ انہوں نے کہا کہ یہ صرف ایک فوجی آپریشن نہیں بلکہ ہندوستان کی سیاسی، سماجی اور عسکری قوت ارادی کا مظاہرہ ہے۔ اس کارروائی سے دنیا کو پیغام گیا کہ دہشت گردی کے خلاف ہندوستان کی پالیسی میں کوئی نرمی نہیں۔وزیر دفاع نے کہا کہ پاکستانی سرزمین پر موجود دہشت گردی کے ڈھانچے کو ختم کرنے کے لیے آپریشن سندور شروع کیا گیا۔ ہماری افواج نے عام شہریوں کو نشانہ نہیں بنایا، جب کہ پاکستان نے نہ صرف شہری علاقوں بلکہ مذہبی مقامات جیسے مندروں، گردواروں اور گرجا گھروں کو بھی نشانہ بنایا۔ اس کے باوجود ہماری فوج نے دلیری، بہادری اور صبر کا مظاہرہ کرتے ہوئے دشمن کو سخت جواب دیا۔راجناتھ سنگھ نے کہا کہ ہندوستان کی کارروائیوں کی دھمک راولپنڈی تک سنی گئی، جہاں پاکستانی فوج کا صدر دفتر واقع ہے۔ انہوں نے یاد دلایا کہ دنیا نے پہلے بھی اُڑی اور پلوامہ کے بعد ہندوستان کی کارروائیاں دیکھیں اور اب پہلگام واقعے کے بعد بھی دیکھ رہی ہے کہ ہندوستان دہشت گردوں کے خلاف مؤثر کارروائی سے پیچھے نہیں ہٹتا۔اس موقع پر راجناتھ سنگھ نے کہا کہ برہموش سہولت کا افتتاح قومی ٹیکنالوجی کے دن کے موقع پر ہوا ہے، جو 11 مئی 1998 کو پوکھران میں ایٹمی تجربے کی یاد دلاتا ہے۔ یہ ہندوستانی سائنسدانوں، انجینئروں اور دفاعی اہلکاروں کی انتھک محنت کا نتیجہ تھا۔ انہوں نے کہا کہ صرف 40 مہینوں میں اس پراجیکٹ کی تکمیل سے ان کا خواب حقیقت میں بدل گیا ہے۔