الحیات نیوز سروس 

چانہو؍بلسوکرا ،26؍اپریل:وقف ترمیمی بل 2025 کی مخالفت میں سنیچر کو بلسوکرا میں وقف بچاؤ سنودھان بچاؤ کانفرنس کا انعقاد کیا گیا۔ جس میں چانہو ، کوڑو،مانڈرکے کئی گاؤں سے خواتین اور مردوں نے وقف قانون کو واپس لینے کا مطالبہ کرتے ہوئے شرکت کی۔ تمام لوگوں نے کہا کہ وقف قانون کو مذہبی حقوق پر حملہ سمجھتے ہوئے اسے واپس لینے کا مطالبہ کیااور حکومت سے اس قانون کو واپس لینے کی اپیل کرتے ہوئے کہا کہ اگر ہمارے مطالبات نہیں مانے گئے تو ہم جھارکھنڈ بھر میں احتجاج جاری رکھیں گے۔منعقدہ پروگرام کی صدارت مولانا سید احمد ولی فیصل رحمانی امیر شریعت بہار جھارکھنڈ اڑیسہ بنگال نے کی۔ پروگرام میں سیاسی و سماجی کارکنوں کی بڑی تعداد نے شرکت کی۔بہار جھارکھنڈ اڑیسہ بنگال کے امیر شریعت مولانا سید احمد ولی فیصل رحمانی نے کہا کہ کوئی بھی قانون ملک اور ریاست کے مفاد میں بنایا جاتا ہے لیکن جس قانون سے پورے سماج کو غصہ آتا ہے اس کا کوئی مطلب نہیں ہے۔منظم پروگرام سے خطاب کرتے ہوئے سابق وزیر بندھو ترکی نے کہا کہ وقف ایکٹ جھارکھنڈ میں لاگو نہیں کیا جائے گا۔ بی جے پی نے مسلمانوں کو ہراساں کرنے کے لیے یہ بل لایا ہے اور پارلیمنٹ سے پاس کروایا ہے۔ لیکن اسے جھارکھنڈ میں کسی بھی قیمت پر لاگو نہیں ہونے دیا جائے گا۔آمیا آرگنائزیشن کے مرکزی صدر ایس علی نے کہا کہ وقف ایکٹ مسلمانوں کی مذہبی خود مختاری اور بنیادی حقوق کی خلاف ورزی ہے۔ حکومت نے مسلم کمیونٹی کی تجاویز پر عمل نہیں کیا۔ انہوں نے مزید کہا کہ مرکزی حکومت کے خلاف یہ تحریک اس وقت تک جاری رہے گی جب تک نیا قانون واپس نہیں لیا جاتا۔ادارہ شرعیہ کے ناظم اعلیٰ مولانا قطب الدین رضوی نے کہا کہ قانون میں مسلم کمیونٹی کی رضامندی کے بغیر ترمیم کی گئی ہے، اسے واپس لینے تک تحریک جاری رہے گی۔جھارکھنڈ حکومت کے سابق وزیر بندھو ترکی کو ایک میمورنڈم پیش کیا گیا اور وقف ایکٹ 2025 کے خلاف جھارکھنڈ میں ایکٹ بنانے کا مطالبہ کیا گیا تاکہ اس قانون کو ریاست میں لاگو نہ کیا جاسکے۔پروگرام کی نظامت مولانا ضیاء الرحمن نے کی۔ اس موقع پر متحدہ علماء ملی کونسل کے صدرڈاکٹر زاہد اقبال، سکریٹری رحمت اللہ انصاری، امن گروپ کے صدر عطاء اللہ انصاری، حکیم انصاری، انجمن اسلامیہ مانڈر کے صدر نور اللہ حبیب ندوی، سکریٹری افروز انصاری، جھارکھنڈ انجمن مہا پنچایت سے جنید انور، انجمن مہا پنچایت کے سکریٹری مولانا محمد طارق احمد، انجمن اسلامیہ رانچی کے سکریٹری ڈاکٹر طارق حسین ،نوشاد انصاری، شفیق انصاری، مولانا غازی صلاح الدین ،حافظ عبدالعزیز ،مولانا عبدالقیوم ،قاری اسجد، ارشاد امام غفار انصاری، ضلع پریشد عادل عظیم، اے آئی ایم آئی ایم کے ریاستی صدر محمد شاکر، سنجر علی ، مولانا حبیب انصاری اور ایم ایل اے کے نمائندے مولانا عبدالقیوم کئی مسلم تنظیموں کے ارکان اورذمہ داران نے شرکت کی۔