الحیات نیوز سروس 

رانچی،5؍اپریل: رام نومی کے پیش نظر سنیچرسے راجدھانی رانچی کے شہری اور دیہی علاقوں میں سخت حفاظتی انتظامات کیے گئے ہیں۔ ضلعی انتظامیہ نے امن و امان برقرار رکھنے کے لیے ہائی الرٹ جاری کر دیا ہے۔ 12 ڈی ایس پیز، 40 انسپکٹرز، 300 سب انسپکٹرز اور 3500 اہلکاروں کو مختلف علاقوں میں تعینات کیا گیا ہے۔اس موقع پر راجدھانی رانچی میں فلیگ مارچ بھی کیاگیا۔ پولیس نے شہر کے 20 تھانوں کے علاقوں میں ڈرون نگرانی کے انتظامات کیے ہیں۔ ہر تھانہ انچارج کو ڈرون مانیٹرنگ کی ذمہ داری دی گئی ہے۔ ڈورنڈا، مین روڈ، کانکے، نگڑی، راتو، پٹھوریا، بڑھمو، مانڈراور بریاتو جیسے حساس علاقوں میں 25 سے زیادہ پوائنٹس کی نشاندہی کی گئی ہے، جہاں فوجیوں کو 24 گھنٹے چوکس رہنے کی ہدایت کی گئی ہے۔

اشتعال انگیز گانوں پر سخت پابندی ہے اور مذہبی جلوسوں میں امن برقرار رکھنے کی اپیل کی گئی ہے۔ پولیس نے واضح کیا ہے کہ ماحول خراب کرنے کی کوشش کرنے والوں کے خلاف سخت کارروائی کی جائے گی۔ سوشل میڈیا پر بھی خصوصی نگرانی کی جا رہی ہے۔سیکورٹی کو مزید مضبوط بنانے کے لیے سی آر پی ایف کی دو کمپنیاں تعینات کی گئی ہیں۔ اس کے علاوہ 40 مقامات پر کیو آر ٹی (کوئیک رسپانس ٹیم) کو تیار رکھا گیا ہے، جسے ضرورت پڑنے پر فوری طور پر استعمال کیا جائے گا۔400 سے زائد مقامات پر نصب سی سی ٹی وی کیمروں کے ذریعے دارالحکومت کی نگرانی کی جا رہی ہے۔ پولیس اہلکار کنٹرول روم میں تین شفٹوں میں مسلسل نگرانی کر رہے ہیں۔ اگر کہیں بھی کوئی مشکوک سرگرمی نظر آئے تو متعلقہ تھانے کو فوری اطلاع دی جا رہی ہے۔ڈپٹی کمشنر کم ضلع مجسٹریٹ منجوناتھ بھجنتری نے رام نومی جلوس اور مندروں کے انتظامات کا معائنہ کیا۔ انہوں نے ہیہل منڈپ ٹولی مندر، دکشن مکھی بجرنگ بلی مندر، پسکا موڑ، پنڈرا مہاویر مندر اور نیوران پور میں واقع تپوون مندر کا دورہ کیا اور ضروری ہدایات دیں۔