الحیات نیوز سروس 

رانچی،27؍مارچ:چیف الیکٹورل آفیسر کے روی کمار نے کہا ہے کہ الیکشن کمیشن آف انڈیا کے رہنما خطوط کی تعمیل میں، تسلیم شدہ سیاسی جماعتوں کے ساتھ انتخابات سے متعلق مسائل پر میٹنگ کی گئی ہے۔ اجلاس میں سیاسی جماعتوں کی تجاویز پر غور کیا گیا۔ فی الحال قانونی دفعات کے مطابق تسلیم شدہ سیاسی جماعتوں کی تجاویز پر عمل درآمد کے لیے کام کیا جائے گا۔ انہوں نے کہا کہ اجلاس میں خاص طور پر پولنگ سٹیشنوں کی منتقلی کو کم کرنے اور اسے صفر کرنے کے حوالے سے تجاویز موصول ہوئیں۔ اس کے ساتھ ہی تسلیم شدہ سیاسی جماعتوں کے نمائندوں نے تجویز پیش کی کہ ایسے ووٹرز کے نام قریبی پولنگ سٹیشنوں کی ووٹر لسٹ میں شامل کئے جائیں جنہیں قریب ہی پولنگ سٹیشن ہونے کے باوجود ووٹ ڈالنے کے لئے دور کے پولنگ سٹیشن جانا پڑتا ہے۔ کے روی کمار جمعرات کو الیکشن ہاؤس میں تمام تسلیم شدہ سیاسی جماعتوں کے نمائندوں کے ساتھ میٹنگ کر رہے تھے۔میٹنگ میں کے روی کمار نے سیاسی جماعتوں کے لیے زمینی سطح پر کام کرنے والے بوتھ لیول ایجنٹس کے الیکشن سے متعلق علم میں اضافے اور بی ایل او کے کام میں ان سے تعاون کی توقع کی۔ انہوں نے کہا کہ سیاسی جماعتوں کو چاہیے کہ وہ اپنے بوتھ لیول ایجنٹس کو بوتھ وائز مقرر کریں اور انہیں الیکشن کمیشن کی طرف سے دی گئی ہدایات کے بارے میں بروقت آگاہ کریں۔ میٹنگ میں مسٹر کمار نے انتخابات کے دوران اور اس کے بعد نچلی سطح پر ووٹروں اور سیاسی جماعتوں کے تجربات کے بارے میں بھی جانکاری حاصل کی۔ الیکشن کمیشن آف انڈیا کی ہدایات کے مطابق تمام اضلاع کے ڈسٹرکٹ الیکشن آفیسر اور ای آر او بھی اپنی اپنی سطح پر تسلیم شدہ سیاسی جماعتوں کے ساتھ میٹنگ کر رہے ہیں۔اس موقع پر جوائنٹ چیف الیکٹورل آفیسر سبودھ کمار، جونیئر الیکٹورل آفیسر سنیل کمار، تمام تسلیم شدہ سیاسی جماعتوں کے نمائندے اور الیکشن سے متعلق عہدیدار موجود تھے۔