دانش ایاز

      رانچی،21؍مارچ(الحیات نیوزسروس) رانچی میں بے موسم بارش نے لوگوں کو گھروں کے اندر رہنے پر مجبور کردیا۔ راجدھانی رانچی سمیت کئی اضلاع میں بھی جمعہ کی صبح سے ہی ابر آلود تھا۔ صبح 10 بجے کے بعد موسلا دھار بارش شروع ہو گئی۔ جس کی وجہ سے دن میں ہی اندھیرا چھا گیا۔ تاہم اس حوالے سے وارننگ پہلے ہی جاری کر دی گئی تھی۔ محکمہ موسمیات کے مطابق گملا اور سمڈیگا کے علاقوں میں آج بارش کا امکان ہے۔رانچی میں واقع موسمیاتی مرکز نے کہا ہے کہ اگلے چند گھنٹوں میں گملا، سمڈیگا کے کئی علاقوں میں بارش کا امکان ہے۔ لوہردگا اور بیڑومیں تیز ہواؤں کے ساتھ ژالہ باری ہوئی۔ اس کے علاوہ لاتیہار، پلامو اور گڑھوا میں آسمانی بجلی گرنے کا امکان ہے۔ شمالی ہندوستان سے آنے والی ہوا کے ساتھ خلیج بنگال کی نم ہوا کی وجہ سے موسم میں اچانک تبدیلی واقع ہوئی ہے۔ یہ نہ تو سائیکلون ہے اور نہ ہی پری مانسون۔ ایسے میں جب بھی اور جہاں کہیں بادل بنیں گے، بارش ہوگی۔22 اور 23 مارچ کو لوہردگا، گملا اور کولہان سمیت کئی علاقوں میں موسلادھار بارش کا امکان ہے۔ اس دوران 40 سے 50 کلومیٹر فی گھنٹہ کی رفتار سے ہوائیں چلیں گی۔ اس سے پہلے جمعرات کو راجدھانی رانچی کے علاوہ دھنباد، جمشید پور اور ہزاری باغ سمیت کئی اضلاع میں بارش ہوئی۔ موسم میں اچانک تبدیلی کے پیش نظر پوری ریاست میں اورنج الرٹ کے ساتھ ایڈوائزری جاری کی گئی ہے۔ محکمہ موسمیات نے تمام لوگوں کو بغیر کسی وجہ کے گھر سے باہر نہ نکلنے اور کھیتوں اور خستہ حال مکانوں میں نہ رہنے کا مشورہ دیا ہے۔ اس کے علاوہ، لوگوں کو برقی آلات کو ان پلگ کرنے کے لیے کہا گیا ہے۔