الحیات نیوز سروس 

    رانچی،27؍فروری: وزیر اعلیٰ ہیمنت سورین 28 فروری کو ریاستی صحت بیمہ اسکیم کا آغاز کریں گے۔ اس کے تحت ریاستی ملازمین اور ان کے اہل خانہ کو ہر سال 5 لاکھ روپے کا مفت انشورنس دیا جائے گا۔ اس کے علاوہ، خاص حالات میں، کسی حادثے یا موت کی صورت میں ایئر ایمبولینس یا ہوائی سفر کی مدد کا بھی انتظام کیا گیا ہے۔جھارکھنڈ میں لاگو ہیلتھ انشورنس اسکیم صرف ریاستی ملازمین کے لیے ہے۔وزیر اعلیٰ ہیمنت سورین کی طرف سے نافذ کی جانے والی اس اسکیم میں ریاستی ملازمین کے اہل خانہ کو ہر سال 5 لاکھ روپے کا بیمہ دیا جائے گا۔ اس کے تحت ریاستی سرکاری ملازمین کسی بھی درج شدہ اسپتالوں میں 5 لاکھ روپے تک کا مفت علاج کروا سکیں گے۔ تاہم بعض سنگین بیماریوں کے لیے 10 لاکھ روپے تک کا انتظام بھی کیا گیا ہے۔ انتہائی نازک حالات کی صورت میں، اگر علاج پر بھاری رقم خرچ ہوتی ہے، تو یہ خرچ ریاستی حکومت کے فنڈز سے برداشت کیا جائے گا۔ یہ اسکیم ایک پروگرام میں شروع کی جائے گی۔ اس میں اسمبلی اسپیکر ربندر ناتھ مہتو، وزیر خزانہ رادھا کرشن کشور، وزیر محنت سنجے پرساد یادو اور وزیر صحت عرفان انصاری شامل ہوں گے۔سرکاری ملازمین کے علاوہ قانون ساز اسمبلی کے اراکین، جھارکھنڈ کے تمام ریٹائرڈ ملازمین کے ساتھ ساتھ ریٹائرڈ افسران، یونیورسٹیوں میں کام کرنے والے اساتذہ، رجسٹرڈ ایڈوکیٹ، حکومت کے مختلف بورڈز کے ملازمین اور میونسپل کارپوریشن کے ملازمین کو ہیلتھ انشورنس اسکیم کا فائدہ ملے گا۔