الحیات نیوز سروس 

رانچی، 23 فروری:جھارکھنڈ اسمبلی کا بجٹ اجلاس کل 24 فروری سے شروع ہو رہا ہے۔ ایوان کے بجٹ اجلاس کا آغاز  24 فروری کو گورنر کے خطاب سے ہوگا۔قانون ساز اسمبلی کے اسپیکر رابندر ناتھ مہتو نے آج یہاں کہا کہ بجٹ اجلاس کے دوران 3 مارچ کو مالی سال 2025-26 کا سالانہ بجٹ وزیر خزانہ رادھا کرشن کشور پیش کریں گے۔ بجٹ اجلاس کے عارضی پروگرام کے مطابق 25 فروری کو پہلی شفٹ میں وقفہ سوالات اور دوسری شفٹ میں گورنر کے خطاب پر بحث ہوگی۔ مہاشیو راتری کی وجہ سے 26 فروری کو کوئی میٹنگ نہیں ہوگی۔ سال 2024-25 کا تیسرا ضمنی بجٹ 27 فروری کو پیش کیا جائے گا۔ دوسرے سیشن میں گورنر کے خطاب پر بحث کے بعد حکومت کے جواب اور ووٹنگ کا پروگرام طے ہے۔تیسرا ضمنی بجٹ 28 فروری کو زیر بحث آئے گا اور اختصاص بل منظور کیا جائے گا۔ سال 2025-26 کا بجٹ 3 مارچ کو پیش کیا جائے گا۔ جبکہ 4 مارچ سے بجٹ پر عام بحث میں حکمران اور اپوزیشن جماعتوں کے ارکان اپنے خیالات پیش کریں گے۔ اس کے بعد مختلف محکموں کے گرانٹ کے مطالبات پر تبادلہ خیال کیا جائے گا۔ اضافی مطالبات زر پر  10 اور 11 مارچ کو دوبارہ بحث کی جائے گی۔ اس کے بعد ہولی اور دیگر تعطیلات کی وجہ سے 12 سے 16 مارچ تک کوئی نشست نہیں ہوگی۔ 17 سے 21 مارچ کے درمیان مختلف محکموں کے ضمنی  مطالبات زر  پر بھی بات کی جائے گی۔ 24 مارچ کو بھی بحث  ہو گی جبکہ 25 اور 26 مارچ کو متعدد بل ایوان میں پیش کیے جائیں گے۔ 27 مارچ کو اجلاس کے آخری روز کچھ سرکاری بل پیش کیے جائیں گے۔