الحیا ت نیوز سروس

پیٹھوریا/کانکے: تعلیم کا مقصد طلبہ و طالبات کی ہمہ جانب ترقی ہے۔ ایک صحت مند جسم میں ہی صحت مند دماغ کا وجود ممکن ہے، اور صحت مند جسم کے لیے کھیل ضروری ہیں۔ یہ باتیں جی ایم ماڈرن پبلک اسکول کے ڈائریکٹر حسیب احمد نے کہیں۔ وہ ہفتے کو ملت اکیڈمی رانچی اور جی ایم ماڈرن پبلک اسکول کے 9ویں کے طلباء کے درمیان کھیلے گئے دوستانہ کرکٹ میچ کے بعد طلبہ سے خطاب کر رہے تھے۔ انہوں نے کہا کہ صلاحیت کسی کی محتاج نہیں ہوتی، دور دراز دیہی علاقوں میں بھی قابلیت کی کمی نہیں ہے، ضروری صرف یہ ہے کہ صلاحیتوں کی پہچان کر انہیں صحیح رہنمائی اور مناسب پلیٹ فارم فراہم کیا جائے۔ جی ایم ماڈرن پبلک اسکول دیہی علاقے کے باصلاحیت طلبہ کی رہنمائی کرتے ہوئے انہیں مناسب پلیٹ فارم فراہم کرنے کے لیے کوشاں ہے، آج کا دوستانہ میچ اسی کوشش کی ایک کڑی ہے۔ ملت اکیڈمی کے ڈائریکٹر اشرف حسین نے کہا کہ مسلم معاشرے کے بچوں کو آج ہر میدان میں آگے آنے کی ضرورت ہے۔ وسائل کی کمی کی وجہ سے بہت سے بچے اپنی صلاحیت کو دنیا کے سامنے نہیں لا پاتے۔ انہوں نے کہا کہ ہم پچھلے دو سالوں سے جی ایم ماڈرن پبلک اسکول کے ساتھ اس طرح کے دوستانہ میچ کا انعقاد کر رہے ہیں۔ یہ میچ شہر کے بچوں اور دیہی علاقے کے بچوں کی قابلیت کا سنگم ہوتا ہے۔ اس سے پہلے عید الہنصاری فٹ بال میدان میں کھیلے گئے 16-16 اوور کے میچ میں ملت اکیڈمی کی ٹیم نے اپنے تمام وکٹ کھو کر 12 اوورز میں صرف 81 رنز ہی بنائے۔ اس کے جواب میں جی ایم ماڈرن پبلک اسکول کی ٹیم نے شاندار بیٹنگ کا مظاہرہ کرتے ہوئے 11 اوورز میں 5 وکٹ کھو کر 82 رنز کا ہدف حاصل کر کے میچ 7 وکٹ سے جیت لیا۔ فاتح ٹیم کی جانب سے مین آف دی میچ رہے عدیل انساری نے ایک ہی اوور میں ایک ہیٹ ٹرک کے ساتھ کل 4 وکٹیں حاصل کیں۔ شاد انساری نے 13 گیندوں میں 20 رنز بنائے، جبکہ فرحان انساری نے بھی 16 رنز کا تعاون دیا۔ ملت اکیڈمی کے کپتان اویز اکمل حسین نے شاندار 24 رنز بنائے اور 3 وکٹیں بھی حاصل کیں۔ میچ کے دوران سیکڑوں کی تعداد میں اسکول کے بچے بھی میدان میں کھلاڑیوں کی حوصلہ افزائی کے لیے موجود تھے۔