میت آج رانچی لائی جائے گی ،وزیر اعلیٰ نے کہا -عظیم تحریک کار اور عوامی لیڈر کو ہم نے کھو دیا
الحیات نیوز سروس
چنئی/رانچی،06؍اپریل: جھارکھنڈ کے وزیرتعلیم جگر ناتھ مہتو کا انتقال ہو گیا۔ انہوں نے جمعرات کے روز چنئی کے اسپتال میں آخری سانس لی۔ وہ گزشتہ کچھ دنوں سے بیمار چل رہے تھے۔ رپورٹ کے مطابق تقریباً ڈیڑھ سال قبل جگر ناتھ مہتو کی پھیپھڑے کی پیوند کاری انجام دی گئی تھی، اس کے بعد سے وہ صحت مند تھے۔ تاہم 20 دن قبل ان کی طبیعت بگڑ گئی۔ اس کے بعد مہتو کو ایئرلفٹ کر کے چنئی لے جایا گیا اور وہیں کے اسپتال میں ان کا علاج جاری تھا۔ تاہم دوران علاج ان کا انتقال ہو گیا۔جھارکھنڈ میں ٹائیگر کے نام سے مشہور جگر ناتھ مہتو جھارکھنڈ کو ریاست کا درجہ دلانے کے لئے چلائی گئی تحریک کے اہم رہنماؤں میں شامل تھے۔ مہتو گریڈیہہ کے ڈومری اسمبلی حلقہ سے لگاتار چار مرتبہ ارکان اسمبلی منتخب ہوئے تھے۔ ان کے انتقال پر وزیر اعلیٰ ہیمنت سورین، بی جے پی لیڈر بابو لال مرانڈی سمیت کئی لیڈران نے گہری تعزیت کا اظہار کیا ہے۔ریاستی حکومت نے جگر ناتھ مہتو کے اعزاز میں 6 اور 7 اپریل کو ریاستی سوگ کا اعلان کیا ہے۔ جن عمارتوں پر قومی پرچم باقاعدگی سے لہرایا جاتا ہے وہاں جھنڈے سرنگوں رہیں گے۔ اس کے ساتھ ہی 6 اپریل کو تمام دفاتر بند رکھنے کا بھی اعلان کیا گیا ہے۔ جمعرات کی شام چار بجے ہونے والاکابینہ کا اجلاس بھی ملتوی کر دیا گیا ہے۔جگرناتھ مہتو کی پیدائش 1967 میں ایک کسان خاندان میں ہوئی تھی۔ سیاست میں وہ ایک ایسی شخصیت تھے، جن کا مخالفین بھی احترام کرتے تھے۔ وہ ڈمری اسمبلی حلقہ میں کافی مقبول تھے، یہی وجہ تھی کہ یہاں کے لوگوں نے انہیں مسلسل چوتھی بار منتخب کر کے اسمبلی میں بھیجا۔
بابولال مرانڈی نے ٹویٹ کیا
انتقال کے بارے میں، بھارتیہ جنتا پارٹی کے لیڈر بابولال مرانڈی نے ایک ٹویٹ میں لکھا کہ جھارکھنڈ حکومت کے وزیر شری جگر ناتھ مہتو جی کی موت چنئی کے ایک اسپتال میں موصول ہوئی ہے۔ طویل عرصے تک بیماری کو شکست دیتے ہوئے جنگجو کی طرح لڑنے والے جگرناتھ جی کی رخصتی پورے جھارکھنڈ کے لیے بہت غمگین ہے۔ ذاتی طور پر، میں نے سیاسی اختلافات کے باوجود ہمیشہ ان کی جانفشانی کی تعریف کی ہے۔
ریاستی سوگ دو دن رہے گا، کابینہ اجلاس ملتوی
وزیر تعلیم جگرناتھ مہتو کے اعزاز میں دو دن کے سرکاری سوگ کا اعلان کیا گیا ہے۔ اس دوران قومی پرچم آدھا جھکا رہے گا۔ اس دوران کوئی سرکاری تقریب نہیں ہوگی۔ آج ریاست کے تمام دفاتر بند رہیں گے۔ ساتھ ہی آج ہونے والا کابینہ اجلاس بھی ملتوی کر دیا گیا ہے۔
