ہمیشہ سچ ہی بیاں کرتا ہے وجہ کیا ہے

یہ کس قدر ہے نڈر آخر آئینہ کیا ہے

 

یہ میرے دل میں جو ہے حشر سا بپا کیا ہے

نہیں ہے جذبۂ چاہت تو پھر بتا کیا ہے

 

مرے شبستاں میں پھیلی جو ہجر کی وحشت

تو جانا جنت و دوزخ کا فلسفہ کیا ہے

 

ضرور مجھ سے بچھڑنے کی ٹھان لی تو نے

نہیں ، تو دل میں مرے پھر یہ ٹوٹتا کیا ہے

 

اگر وہ حق ہے ترا پھر تو چھین لے جاکر

بھکاریوں کی طرح تو یہ مانگتا کیا ہے

 

ترے علاوہ کیوں آنکھوں کو کوئی بھاتا نہیں

ترے وجود میں خاص ایسا کچھ بتا کیا ہے

 

میں روز آ کے مٹا دوں گا تیرا ہر شکوہ

مرے عزیز بتانا ترا پتہ کیا ہے

 

وہ زہر نوشئ نفرت تو چھوڑ دے لیکن

بتائے کون اسے عشق کا نشہ کیا ہے

 

ہے خوش نصیب کہ آیا ہے پیار خود تجھ تک

گلے سے بڑھ کے لگا لے تو سوچتا کیا ہے