نئی دہلی، 13 مئی (یو این آئی) ہندوستان نے منگل کو ہندوستان اور پاکستان کے درمیان ثالثی سے متعلق امریکی صدر ڈونالڈ ٹرمپ کے بیان کو واضح طور پر مسترد کرتے ہوئے کہا کہ جموں و کشمیر سے متعلق کسی بھی مسئلے کو دو طرفہ طور پر حل کرنا دونوں ممالک کی پالیسی ہے اور دونوں کے درمیان ایک ہی مسئلہ زیر التوا ہے کہ پاکستان کو غیر قانونی طور پر قابض ہندوستانی علاقے کو خالی کرنا ہے۔ جب یہاں ایک باقاعدہ بریفنگ میں جموں و کشمیر پر امریکی صدر کے ریمارکس کے بارے میں پوچھا گیا تو وزارت خارجہ کے ترجمان رندھیر جیسوال نے کہا کہ یہ طویل عرصے سے ہمارا قومی موقف رہا ہے کہ جموں و کشمیر کے مرکزی علاقے سے متعلق کسی بھی مسئلے کو ہندوستان اور پاکستان کو دو طرفہ طور پر حل کرنا ہوگا۔ اس پالیسی میں کوئی تبدیلی نہیں ہوئی۔ جیسا کہ آپ جانتے ہیں، زیر التواء معاملہ صرف پاکستان کے غیر قانونی طور پر قابض ہندوستانی علاقے کو خالی کرانے کا ہے۔ مسٹر جیسوال نے یہ بھی واضح کیا کہ جموں و کشمیر کے مسئلہ پر ہندوستان کی پالیسی میں کسی تیسرے فریق کی مداخلت نہیں ہے۔ سندھ طاس معاہدے سے متعلق ایک سوال کے جواب میں ترجمان نے کہا کہ یہ معاہدہ خیر سگالی اور دوستی کے جذبے کے تحت کیا گیا جیسا کہ معاہدے کی تمہید میں بیان کیا گیا ہے۔ تاہم، پاکستان نے کئی دہائیوں سے سرحد پار دہشت گردی کو فروغ دے کر ان اصولوں کو نظر انداز کیا ہے۔ اب، 23 اپریل کے کیبنٹ کمیٹی برائے سیکیورٹی (سی سی ایس) کے فیصلے کے مطابق، ہندوستان اس معاہدے کو اس وقت تک معطل رکھے گا جب تک کہ پاکستان قابل اعتبار اور ناقابل واپسی طور پر سرحد پار دہشت گردی کی حمایت ترک نہیں کرتا۔ یہ بات بھی قابل توجہ ہے کہ موسمیاتی تبدیلی، آبادیاتی تبدیلیوں اور تکنیکی تبدیلیوں نے زمین پر نئی حقیقتیں پیدا کی ہیں۔