ایریزونا (امریکہ)، 2 مارچ (یو این آئی) ہندوستان کے مادھویندر شیخاوت نے بگ اسکائی انڈور ٹریک اینڈ فیلڈ چیمپئن شپ 2025 میں مردوں کی 60 میٹر رکاوٹ دوڑ (ہرڈلس ) میں قومی ریکارڈ کی برابری کی۔21 سالہ ہندوستانی کھلاڑی ہفتہ کو امریکہ کی ایریزونا یونیورسٹی میں منعقدہ بگ اسکائی انڈور ٹریک اینڈ فیلڈ چیمپئن شپ میں رکاوٹ دوڑ جیتنے کے لئے 7.64 سیکنڈ کے وقت کے ساتھ ٹاپ پر رہے۔ اس کے ساتھ انہوں نے تیجس شرسے کے فرانس میں گزشتہ ماہ بنائے گئے ریکارڈ کی برابری کرلی۔مادھویندر نے فائنل میں جمیکا کے جیروم کیمپبل کو شکست دے کر کامیابی حاصل کی۔ اس چیمپئن شپ میں جیروم 7.65 سیکنڈز کے ساتھ دوسرے اور امریکہ کے زیچری ونگر 7.93 سیکنڈز کے ساتھ تیسرے نمبر پر رہے۔مادھویندر نے جمعہ کو ہیٹس میں سرفہرست مقام حاصل کیا تھا۔ انہوں نے 7.79 سیکنڈ میں فنش لائن عبور کی اور آٹھ افراد کے فائنل کے لیے کوالیفائی کیا۔ ان کا پچھلا ذاتی بہترین وقت 7.68 سیکنڈ تھا جو انہوں نے 14 فروری کو سیٹل میں درج کیا تھا۔چین کے شہر نانجنگ میں 21 سے 23 مارچ تک ہونے والی ورلڈ ایتھلیٹکس انڈور چیمپئن شپ 2025 کے لیے مردوں کی 60 میٹر رکاوٹ دوڑ کے لیے ہرڈلس کا آٹو میٹک کوالیفکیشن وقت 7.57 سیکنڈ ہے۔ مادھویندر اور شرسے ورلڈ انڈور چیمپیئن شپ کے لیے کوالیفائنگ وقت عبور نہیں کر سکے لیکن دونوں بہترین کارکردگی کا مظاہرہ کرنے والے کھلاڑیوں کی فہرست میں جگہ حاصل کرنے کی دوڑ میں موجود ہیں۔