ناگپور، 18 فروری (یو این آئی) رنجی ٹرافی کے دوسرے سیمی فائنل میں بدھ کو آکاش آنند (106) کی سنچری اننگز کے درمیان ودربھ کے پارتھ ریکھڑے اور دیگر گیند بازوں نے شاندار کارکردگی کا مظاہرہ کرتے ہوئے ممبئی کی پہلی اننگز کو 270 کے اسکور پر سمیٹ دیا۔ ممبئی نے کل کے اسکور سات وکٹ پر 188 رن سے اپنی اننگز دوبارہ شروع کی۔ آج کے صبح کے سیشن میں آکاش آنند اور تنوش کوٹیان کی جوڑی نے جارحانہ بلے بازی کا مظاہرہ کرتے ہوئے ٹیم کے اسکور کو آگے بڑھایا۔ اس دوران 247 کے اسکور پر پارتھ ریکھڑے نے تنوش کوٹیان کو آؤٹ کر کے اس شراکت کو توڑا۔ تنوش کوٹیان نے 75 گیندوں پر چار چوکوں اور ایک چھکے کی مدد سے (33) رن بنائے۔ ممبئی نے اپنا نواں وکٹ آکاش آنند کی صورت میں کھویا۔ انہیں نچیکیت بھوٹے نے آؤٹ کیا۔ آکاش آنند نے 256 گیندوں میں 11 چوکوں کی مدد سے (106) رن بنائے۔ ہرش دوبے نے موہت اوستھی (10) کو آؤٹ کر کے ممبئی کی پہلی اننگز 270 پر سمیٹ دی۔ اس کے ساتھ ہی ودربھ کو پہلی اننگز کی بنیاد پر 113 رن کی برتری حاصل ہوگئی۔ودربھ کے لیے پارتھ ریکھڑے نے چار، یش ٹھاکر اور ہرش دوبے نے دو دو وکٹ لیے۔ درشن نالکنڈے اور نچیکیت بھوٹے نے ایک ایک بلے باز کو آؤٹ کیا۔