نئی دہلی، 24 جنوری (یو این آئی) مرکزی وزیر مملکت برائے کھیل نکھل کھڈسے نے جمعہ کو ہندوستانی کھو-کھو فیڈریشن کو یقین دلایا کہ وہ مہاراشٹر میں کھو-کھو ورلڈ چیمپئن شپ کے انعقاد کی درخواست پر ریاستی حکومت سے بات کریں گی۔ آج یہاں منعقدہ ایک پروقار تقریب میں کھیلوں کی وزیر مملکت کھڈسے نے ورلڈ کپ جیتنے والی کھو-کھو ٹیموں کو مبارکباد دی اور ان کی شاندار کارکردگی کی تعریف کی اور کہا کہ حکومت کھو کھو جیسے دیسی کھیل کو فروغ دینے کی ہر ممکن کوشش کرے گی۔انہوں نے کہا کہ یہ ملک کے لیے ایک اہم موقع ہے کہ ہماری مرد اور خواتین دونوں ٹیموں نے کھو کھو کا پہلا ورلڈ کپ جیتا ہے، خاص طور پر جس انداز میں ہم نے یہ شاندار فتح حاصل کی اس سے مجھے بہت فخر محسوس ہوتا ہے۔ انہوں نے کہا کہ یہ ہمارا دیسی کھیل ہے، اپنی مٹی اور اپنے گاؤں کا کھیل ہے۔ پورے ملک نے اس جیت کا جشن منایا۔ میں کھو کھو فیڈریشن آف انڈیا (کے کے ایف آئی) کے صدر سدھانشو متل اور ان کی پوری ٹیم کو مبارکباد دینا چاہوں گی جنہوں نے اس کھیل کو مطلوبہ شہرت دلانے اور بین الاقوامی سطح پر دھوم مچانےکی بہت کوششیں کیں۔ انہوں نے کہا کہ مہاراشٹر کے کھلاڑیوں نے ہی نہیں، جہاں سے اس کھیل کی شروعات ہوئی ہے بلکہ دیگر ریاستوں نے بھی بہت اچھی کارکردگی کا مظاہرہ کیا جسے دیکھ کر بہت خوشی ہوتی ہے۔ میں تمام کھلاڑیوں سے درخواست کروں گی کہ وہ اپنی ریاستوں/اضلاع/شہروں وغیرہ میں کھیل کو فروغ دیں۔ انہوں نے تمام کھلاڑیوں کے لئے ان کے مستقبل کے لیے نیک خواہشات کا اظہار کیا۔ انہوں نے کہا کہ ہم اس کھیل کو اولمپکس میں شامل کرانے کی کوشش کر رہے ہیں۔ انہوں نے کہا کہ اس کھیل میں حصہ لینے کے لئے پورے ملک کی تمام ریاستوں سے کھلاڑی آ رہے ہیں۔ انہوں نے کہا، "میں کھو کھو فیڈریشن کی طرف سے پیش کیے جانے والے مطالبات کے بارے میں پراعتماد ہوں، وہ اس پر مرکزی وزیر کھیل منسکھ مانڈویہ سے بات کریں گی۔" انہوں نے کہا کہ ہماری کوشش رہے گی کہ اس کھیل کو ملک کی ہر ریاست میں منعقد کیا جائے۔ مسٹر متل نے کہا کہ کھو کھو ورلڈ کپ کے انعقاد میں محترمہ کھڈسے نے ہماری سب سے زیادہ مدد کی اور وزیر اعلی دیویندر فڑنویس سے بات کرنے کے بعد ہمیں ریاستی حکومت سے گرانٹ ملی۔ انہوں نے ریاستی وزیر کھیل کھڈسے سے درخواست کی کہ وہ مہاراشٹر میں عالمی چمپئن شپ کے انعقاد کے لیے مہاراشٹر حکومت سے بات کریں۔ وزیر مملکت برائے کھیل نے انہیں یقین دلایا کہ وہ مہاراشٹر میں کھو کھو ورلڈ چمپئن شپ کے انعقاد کے سلسلے میں چیف منسٹر فڑنویس سے بات کریں گی۔ انہوں نے کہا کہ محترمہ کھڈسے کے سمجھانے کے بعد مہاراشٹر حکومت نے کھو کھو ورلڈ کپ میں حصہ لینے والے ہر کھلاڑی کو 2.25 لاکھ روپے کا نقد انعام اور فرسٹ کلاس نوکری دینے کی منظوری دی ہے۔ اس مدت کے دوران مسٹر متل نے ریاستی وزیر کھیل سے درخواست کی کہ وہ مرکزی حکومت کے تحت جیتنے والی ٹیموں کو 40 لاکھ روپے دینے کے انتظام کے مطابق یہ رقم مرد اور خواتین کی ٹیموں کو ترغیب کے طور پر فراہم کریں۔ اس کے ساتھ ہی انہوں نے مرکزی حکومت سے ریاستی حکومتوں کو خط لکھ کر مراعاتی رقم فراہم کرنے کی درخواست کی۔