ڈربن، 18 جنوری (یو این آئی) لگاتار تین شکستوں سے دوچار ہونے کے بعد دفاعی چیمپئن سن رائزرس ایسٹرن کیپ نے ایس اے 20 کرکٹ ٹورنامنٹ کے تیسرے ایڈیشن میں ڈربن سپر جائنٹس کے خلاف 58 رنز کی بونس جیت کے ساتھ اپنا کھاتہ کھول دیا۔کنگس میڈ میں ٹاس جیت کر پہلے بیٹنگ کا فیصلہ کرنے والی سن رائزرز نے مقررہ 20 اوورز میں پانچ وکٹوں کے نقصان پر 165 رنز بنائے جس کے جواب میں سپر جائنٹس کی ٹیم صرف 107 رنز ہی بنا سکی۔ انگلینڈ کے بلے باز زیک کرولی نے 29 گیندوں پر 34 رنز بنا کر ابتدائی رفتار فراہم کی جب کہ ٹام ایبل نے مڈل آرڈر میں پانچ چوکوں کی مدد سے 39 گیندوں پر 57 رنز بنائے۔ گزشتہ میچ میں نصف سنچری بنانے والے مارکو جانسن نے 26 گیندوں پر ناٹ آوٹ 36 رنز بنا کر اننگز کو ایک بار پھر مضبوط کیا۔پراسرار اسپنر نور احمد نے 24 رنز دے کر چار وکٹیں حاصل کیں۔ وہ سپر جائنٹس کے سب سے کامیاب بولر ثابت ہوئے۔ سپر جائنٹس کا جواب مثبت انداز میں شروع ہوا جب کہ اوپنرز برائس پارسنز اور میتھیو بریٹزکے نے پہلی وکٹ کے لیے 40 رنز جوڑے۔ تاہم، سپر جائنٹس پارسنز کے رن آؤٹ ہونے کے بعد کبھی سنبھل نہیں پائے، جنہوں نے 21 گیندوں پر 23 رنز بنائے۔ بائیں ہاتھ کے اسپنر لیام ڈاسن نے کین ولیمسن (3) کو کیچ اور بریٹزکے (21) کو ایل بی ڈبلیو کر کے اپنے تجربے کا مظاہرہ کیا۔ انہوں نے اپنے چار اوورز میں 18 رنز دے کر دو وکٹیں حاصل کیں۔سن رائزرز کے تیز گیند بازوں نے شاندار آل راؤنڈ باؤلنگ کا مظاہرہ کیا، رچرڈ گلیسن اور اوٹنیل بارٹ مین نے 17 رنز کے عوض دو وکٹیں لے کر سپر جائنٹس کو صرف 107 رنز پر آؤٹ کر دیا۔ دونوں ٹیمیں اتوار کو سینٹ جارج پارک میں ایک بار پھر آمنے سامنے ہوں گی۔