نئی دہلی،03؍اپریل(ایجنسی)رام نومی پر تشدد اور فسادات پر سیاسی تنازعہ تھمنے کا نام نہیں لے رہا ہے۔ اس معاملے پر کانگریس صدر ملکارجن کھڑگے کا بیان سامنے آیا ہے۔ بی جے پی پر سنگین الزام لگاتے ہوئے انہوں نے کہا کہ جب بھی بی جے پی کو یہ احساس ہوتا ہے کہ وہ کمزور ہو رہی ہے تو وہ فرقہ وارانہ فسادات کو ہوا دیتی ہے اور لوگوں کو پولرائز کرتی ہے۔ انہوں نے کہا کہ یہ فسادات بی جے پی کی حرکت ہے۔اس سے قبل ادھو ٹھاکرے دھڑے کے سنجے راوت نے بھی اس معاملے پر بی جے پی کو نشانہ بنایا تھا۔ انہوں نے کہا کہ بنگال میں تشدد بی جے پی کی طرف سے منصوبہ بند، اسپانسر اور نشانہ بنایا گیا ہے۔ جب بھی الیکشن قریب ہوتے ہیں اور بی جے پی کو اپنے نقصان کا خوف ہوتا ہے یا جہاں بی جے پی کی حکومت کمزور ہے وہاں فسادات ہوتے ہیں۔بہار تشدد کے بارے میں کانگریس قانون ساز پارٹی لیڈر اجیت شرما نے پہلے کہا تھا کہ بہار میں ان دنوں جو کچھ ہو رہا ہے وہ ہمیں 1989 کے فسادات کی یاد دلا رہا ہے۔ اس ہنگامے میں نہ جانے کتنے لوگوں کی جانیں گئیں۔ کتنے بے گناہ لوگ مارے گئے جنہیں آج تک انصاف نہیں ملا اور بی جے پی ایک بار پھر بہار میں اسی طرح کے فسادات کرانے کا منصوبہ بنا رہی ہے۔ انہوں نے اسے 2024 میں ہونے والے انتخابات سے بھی جوڑا۔ درحقیقت، مغربی بنگال اور بہار میں رام نومی یعنی 30 مارچ کے دن شروع ہونے والا تشدد ابھی تک نہیں رکا ہے۔ اب بھی دونوں ریاستوں میں ہنگامہ جاری ہے۔ تمام اپوزیشن پارٹیوں نے اب اس معاملے پر بی جے پی کو گھیرنا شروع کر دیا ہے اور اسے لوک سبھا انتخابات سے جوڑا جا رہا ہے۔