نئی دہلی،07؍مئی(ایجنسی)کانگریس مجلس عاملہ (سی ڈبلیو سی) نے پاکستان اور پاکستان مقبوضہ کشمیر میں دہشت گردوں کے ٹھکانوں پر ہندوستانی فوج کے ذریعہ کیے گئے میزائل حملے پر بدھ کے روز ہنگامی میٹنگ بلائی۔ اس میٹنگ میں پارٹی کے سرکردہ لیڈران شامل ہوئے اور مسلح افواج کو نیک خواہشات پیش کرتے ہوئے ان کے تئیں اپنی حمایت ظاہر کی۔کانگریس مجلس عاملہ کی میٹنگ کے بعد پارٹی صدر ملکارجن کھڑگے نے میڈیا کے سامنے کہا کہ ’’ہندوستانی مسلح افواج پر ہم فخر کرتے ہیں، جنھوں نے ’آپریشن سندور‘ کے تحت پاکستان اور پاکستان مقبوضہ کشمیر میں دہشت گردوں کے ٹھکانوں پر بہادری کے ساتھ نتیجہ خیز کارروائی کرتے ہوئے منھ توڑ جواب دیا ہے۔ ہم اپنے جانباز فوجیوں کی ہمت، عزائم اور حب الوطنی کو سلام کرتے ہیں۔‘‘کھڑگے کا کہنا ہے کہ پہلگام میں ہوئے دہشت گردانہ حملے کے دن سے ہی کانگریس نے صاف طور پر مسلح افواج اور حکومت کے ساتھ یکجہتی کے ساتھ کھڑے ہو کر سرحد پار دہشت گردی کے خلاف ہر نتیجہ خیز کارروائی کی حمایت کی تھی۔

نھوں نے مزید کہا کہ پاکستان اور پاکستان مقبوضہ کشمیر سے پیدا ہونے والی دہشت گردی کی سبھی شکلوں کے خلاف ہندوستان کی قومی پالیسی بہت واضح اور مضبوط ہے۔کھڑگے کے مطابق عظیم ملک ہندوستان کے قومی اتحاد اور سالمیت کی حفاظت کے لیے سبھی سطح پر یکجہتی کی بہت ضرورت ہے۔ کانگریس ملک کے بہادر جوانوں کے ساتھ کندھے سے کندھا ملا کر کھڑی ہے۔ کانگریس صدر یہ بھی کہتے ہیں کہ ’’تاریخ گواہ ہے کہ ہمارے ہیروز نے ہمیشہ قومی مفاد کو بالاتر رکھتے ہوئے ملک کے اتحاد و سالمیت کے لیے اپنی شہادت دی ہے۔‘‘لوک سبھا میں حزب اختلاف کے قائد اور کانگریس کے سابق صدر راہل گاندھی نے بھی میڈیا سے خطاب کیا۔ انھوں نے کہا کہ اپنے مسلح افواج پر ہمیں بہت فخر ہے اور ہم ان کے ساتھ کھڑے ہیں۔ حکومت جو قدم اٹھا رہی ہے، اس کی ہم حمایت کرتے ہیں اور ہمیں ہمارے مسلح افواج پر فخر ہے۔ ہم اپنے جوانوں کی حب الوطنی کو سلام کرتے ہیں۔واضح رہے کہ ہندوستانی مسلح افواج نے منگل کی دیر شب ’آپریشن سندور‘ چلا کر پاکستان و پاکستان مقبوضہ کشمیر میں جیش محمد، لشکر طیبہ اور حزب المجاہدین جیسی ممنوعہ دہشت گرد تنظیموں کے ٹھکانوں سمیت دہشت گردوں سے جڑے 9 اڈوں کو نشانہ بنایا تھا۔ نشانہ بنائے گئے ٹھکانوں میں بہاول پور کا مرکز سبحان اللہ، تہرا کلاں کا سرجل، کوٹلی کا مرکز عباس اور مظفر آباد کا سیدنا بلال کیمپ شامل ہیں۔ یہ سبھی ٹھکانے جیش محمد سے جڑے ہیں۔ اس مہم میں لشکر طیبہ کے جن ٹھکانوں کو ہدف بنایا گیا ان میں مریدکے کا مرکز طیبہ، برنالہ کا مرکز اہل حدیث اور مظفر آباد کا شواوائی نالہ کیمپ شامل ہیں۔