نئی دہلی، 12 فروری (یو این آئی) قطر کی ایک کمپنی میں کام کرنے والے ہندوستانی بحریہ کے آٹھ سابق اہلکاروں کو رہا کر دیا گیا ہے اور ان میں سے سات کل رات وطن واپس آگئے ہیں۔وزارت خارجہ نے آج یہاں ایک ریلیز میں یہ اطلاع دی۔ وزارت خارجہ نے کہا کہ حکومت ہند قطر میں زیر حراست دہرہ گلوبل کمپنی کے لیے کام کرنے والے آٹھ ہندوستانی شہریوں کی رہائی کا خیرمقدم کرتی ہے۔ ان آٹھ افراد میں سے سات ہندوستان واپس آچکے ہیں۔ہم ان شہریوں کی رہائی اور وطن واپسی کے لیے قطر کے امیر کے فیصلے کی ستائش کرتے ہیں۔وطن واپسی کے بعد میڈیا سے بات کرتے ہوئے ایک اہلکار نے کہا کہ وہ اپنی رہائی پر بہت خوش ہیں اور یہ مشکل کام وزیر اعظم نریندر مودی کی ذاتی مداخلت کے بغیر ممکن نہیں تھا۔وزارت خارجہ نے ابھی تک قطر میں آٹھویں ہندوستانی کے بارے میں کچھ نہیں کہا ہے۔