نئی دہلی، 27 اپریل (یو این آئی) وزیر اعظم نریندر مودی نے اتوار کو کہا کہ پہلگام دہشت گردانہ حملے کے متاثرین کو انصاف ملے گا اور قصورواروں کے خلاف سخت ترین کارروائی کی جائے گی۔آل انڈیا ریڈیو پر اپنے ماہانہ ریڈیو پروگرام من کی بات کے 121ویں ایپی سوڈ میں ہم وطنوں سے خطاب کرتے ہوئے مسٹر مودی نے کہا کہ جموں و کشمیر کے پہلگام میں ہوئے دہشت گردانہ حملے سے ملک کا ہر فرد درد اور غصے میں ہے۔ انہوں نے کہا کہ حملے سے متاثرہ ہر ایک خاندان سے ہمدردی ہے۔ انہوں نے کہا ’’میں ایک بار پھر متاثرہ خاندانوں کو یقین دلاتا ہوں کہ انہیں انصاف ملے گا، انصاف کی فتح ہوگی۔ اس حملے کے مجرموں اور سازش کرنے والوں کو سخت ترین جواب دیا جائے گا۔‘‘مسٹر مودی نے کہا کہ جنہوں نے اس حملے میں اپنے پیاروں کو کھو دیا ہے۔ ان کا درد ملک کا ہر شخص محسوس کر رہا ہے ۔ دہشت گردانہ حملے کی تصویریں دیکھ کر ہر ہندوستانی کا خون کھول رہا ہے۔وزیر اعظم نے کہا ’’پہلگام میں یہ حملہ دہشت گردی کی حمایت کرنے والوں کی مایوسی کو ظاہر کرتا ہے، یہ ان کی بزدلی کو ظاہر کرتا ہے۔ ایک ایسے وقت میں جب کشمیر میں امن لوٹ رہا تھا، اسکولوں اور کالجوں میںسرگرمی سے ہلچل تھی، تعمیراتی کاموں نے بے مثال رفتار حاصل کی تھی، جمہوریت مضبوط ہو رہی تھی، سیاحوں کی تعداد میں ریکارڈ اضافہ ہو رہا تھا، لوگوں کی آمدنی میں اضافہ ہو رہا تھا اور جموں کے نوجوانوں کے لیے نئے مواقع پیدا  کیے جا رہے تھے۔ انہوں نے کہا کہ دہشت گرد اور دہشت گردی کے آقا کشمیر کو دوبارہ تباہ کرنا چاہتے ہیں اس لیے انہوں نے اتنی بڑی سازش رچی۔مسٹر مودی نے کہا کہ ملک کا اتحاد، 140 کروڑ ہندوستانیوں کی یکجہتی، دہشت گردی کے خلاف اس جنگ میں ہماری سب سے بڑی طاقت ہے۔ یہ اتحاد دہشت گردی کے خلاف ہماری فیصلہ کن جنگ کی بنیاد ہے۔ ملک کو درپیش اس چیلنج کا مقابلہ کرنے کے لیے ہمیں اپنے عزم کو مضبوط کرنا ہوگا۔ ہمیں بحیثیت ملک مضبوط عزم کا مظاہرہ کرنا ہوگا۔ آج دنیا دیکھ رہی ہے، اس دہشت گردانہ حملے کے بعد پورا ملک ایک آواز میں بول رہا ہے۔انہوں نے کہا کہ جو غصہ ہمیں ہندوستان میں ہے وہی غصہ پوری دنیا میں موجود ہے۔ اس دہشت گردانہ حملے کے بعد پوری دنیا سے تعزیت کا سلسلہ جاری ہے۔ عالمی رہنماؤں نے مجھے فون کئے، خط لکھے اور پیغامات بھیجے۔ اس گھناؤنے دہشت گردانہ حملے کی سبھی نے شدید مذمت کی ہے۔ انہوں نے مرنے والوں کے اہل خانہ سے تعزیت کا اظہار کیا ہے۔ دہشت گردی کے خلاف ہماری جنگ میں پوری دنیا ہندوستانیوں کے ساتھ کھڑی ہے۔