ناگپور،18؍مارچ(ایجنسی) مہاراشٹر کے ناگپور کے محال علاقے میں پیر یعنی کل تشدد کے بعد رات گئے ایک اور علاقے میں آگ لگنے کی خبریں سامنے آئی ہیں۔ پولیس حکام نے بتایا کہ ہنسپوری علاقے میں بھی شرپسندوں نے کئی دکانوں اور مکانات کو نشانہ بنایا ہے۔ پولیس نے شہر میں امتناعی احکامات نافذ کر دیے ہیں۔ نیوز پورٹل ’آج تک‘ پر شائع خبر کے مطابق ناگپور کے پولس کمشنر ڈاکٹر رویندر سنگل نے کہا کہ شہر میں انڈین سول سیکورٹی کوڈ کی دفعہ 163 نافذ کر دی گئی ہے۔درحقیقت جھڑپ کا پہلا واقعہ پیر کی شام تقریباً 7.30 بجے محال کے چٹنیس پارک علاقے میں پیش آیا۔دوسری جھڑپ 10.30 بجے سے 11.30 بجے کے درمیان ہنسپوری علاقے میں پرانا بھنڈارا روڈ کے قریب ہوئی۔ اس دوران مشتعل ہجوم نے علاقے میں کئی گاڑیوں کو نذر آتش کیا اور توڑ پھوڑ کی اور مکانات کو آگ لگا دی۔ایک رپورٹ کے مطابق، ہنسپوری علاقے کے رہنے والے شرد گپتا نے بتایا کہ ہجوم رات 10.30 سے ​​11.30 بجے کے درمیان آیا اور پتھراؤ کیا اور گاڑیوں کو آگ لگا دی۔ انہوں نے یہ بھی کہا کہ پولیس ایک گھنٹے بعد موقع پر پہنچی۔ اس وقت علاقے میں امن ہے۔یہ تشدد مسلم تنظیموں کے اس دعوے کے بعد ہوا کہ وشو ہندو پریشد(وی ایچ پی) اور بجرنگ دل سمیت کچھ ہندو تنظیموں کے ارکان نے احتجاج کے دوران ایک کپڑا جلا دیا جس پر مذہبی پیغامات درج تھے۔ یہ احتجاج سمبھاج نگر میں مغل حکمران اورنگ زیب کے مقبرے کو ہٹانے کا مطالبہ کرتے ہوئے کیا گیا تھا۔ مقامی انتظامیہ نے صورتحال پر قابو پانے کے لیے پولیس کی اضافی نفری تعینات کر دی ہے اور علاقے میں سکیورٹی سخت کر دی گئی ہے۔واضح رہے کہ اورنگ زیب کے مقبرے پر تنازع کے درمیان پیر کی شام مہاراشٹر کے ناگپور کے محال علاقے میں دو گروپوں کے درمیان پرتشدد تصادم ہوا۔ اس دوران شرپسندوں نے کئی گاڑیوں کو آگ لگا دی۔ انہوں نے پتھراؤ کیا اور سرکاری املاک کو نقصان پہنچایا۔ پتھراؤ سے کئی پولیس اہلکار زخمی بھی ہوئے ہیں۔وزیر اعلیٰ دیویندر فڑنویس نے ناگپور میں پرتشدد جھڑپوں کے سلسلے میں امن کی اپیل کی ہے۔ انہوں نے کہا کہ شہری اس صورتحال میں انتظامیہ کے ساتھ مکمل تعاون کریں۔ وزیراعلیٰ نے کہا کہ ہم پولیس انتظامیہ کے ساتھ مسلسل رابطے میں ہیں اور شہری ان کے ساتھ تعاون کریں۔ دیویندر فڑنویس نے کسی بھی افواہ پر یقین نہ کرنے اور انتظامیہ کے ساتھ مکمل تعاون کرنے کی اپیل کی ہے۔