نئی دہلی ، 18 اگست (یو این آئی) وزیر اعظم نریندر مودی نے کہا ہے کہ ہندوستان نے  روس-یوکرین تنازعہ کے پرامن حل پر مسلسل زور دیا ہے اور اس سمت میں کی جانے والی تمام کوششوں کی حمایت کرتا ہے۔مسٹر نریندر مودی نے یہ بات پیر کے روز روسی صدر ولادیمیر پوتن کے ساتھ ٹیلی فون پر گفتگو کے بعد کہی۔انہوں نے سوشل میڈیا پر ایک پوسٹ میں کہا، "میرے دوست، صدر پوتن کا مجھے فون کرنے  اور الاسکا میں صدر ٹرمپ کے ساتھ اپنی حالیہ ملاقات کے بارے میں معلومات شیئر کرنے کے لیے بہت شکریہ۔ ہندوستان نے  روس- یوکرین تنازعہ کے پرامن حل پر مسلسل زور دیا ہے اور اس سلسلے میں تمام کوششوں کی حمایت کی ہے۔ میں آنے والے دنوں میں مسلسل رابطے کا منتظر ہوں۔"وزیر اعظم کے دفتر نے  کہا کہ صدر پوتن نے وزیر اعظم مودی سے فون پر بات کی ہے اور انہیں الاسکا میں امریکی صدر ڈونالڈ ٹرمپ کے ساتھ اپنی ملاقات کے بارے میں آگاہ کیا ہے۔وزیر اعظم مودی نے تنازعہ کے پرامن حل کے لیے ہندوستان کے مضبوط موقف کا ذکر کرتے ہوئے  اس سلسلے میں تمام کوششوں کے لیے ہندوستان کی حمایت کا اعادہ کیا۔ دونوں رہنماؤں نے دو طرفہ تعاون کے متعدد امور پر بھی تبادلہ خیال کیا جس کا مقصد ہندوستان اور روس کے درمیان خصوصی اور اعلی سطح پر اسٹریٹجک شراکت داری کو مزید مضبوط بنانا ہے۔دونوں رہنماؤں نے رابطے میں رہنے پر بھی اتفاق کیا۔