نئی دہلی، 18 اگست (یو این آئی) وزیر خارجہ ایس جے شنکر نے پیر کے روز کہا کہ ہندوستان اور چین اب دو طرفہ تعلقات کے مشکل مرحلے کے بعد تعلقات کو آگے بڑھانا چاہتے ہیں، اور اس کے لیے دونوں ملکوں کی طرف سے واضح اور تعمیری موقف اپنانے کی ضرورت ہے۔مسٹر جے شنکر ہندوستان کے دورے پر آنے والے چین کے وزیر خارجہ وانگ یی کے ساتھ راجدھانی میں منعقدہ ملاقات میں اپنا ابتدائی بیان دے رہے تھے۔ اکتوبر 2024 میں کازان میں وزیر اعظم نریندر مودی اور چینی صدر شی جن پنگ کی ملاقات کے بعد کسی چینی وزیر کا ہندوستان کا یہ پہلا دورہ ہے۔مسٹر جے شنکر نے کہا، "ہمارے تعلقات میں مشکل مرحلہ گزرنے کے بعد، اب دونوں ہمسایہ  ممالک آگے بڑھنا چاہتے ہیں۔ اس کے لیے دونوں طرف سے واضح اور تعمیری موقف اپنانے کی ضرورت ہے۔" انہوں نے ہندوستان اور چین کے خصوصی نمائندوں کے درمیان بات چیت کے 24 ویں دور کے لئے وانگ یی اور ان کے ہمراہ آنے والے  چینی وفد کا خیرمقدم کیا۔ انہوں نے کہا کہ یہ موقع ہمیں اپنے دوطرفہ تعلقات کا جائزہ لینے اور تعمیری بات چیت کرنے کا موقع فراہم کرتا ہے۔ یہ عالمی صورتحال اور باہمی دلچسپی کے بعض امور پر تبادلہ خیال کرنے کا بھی موقع ہے۔وزیر خارجہ نے کہا کہ ہندوستان اور چین کو اپنے تعلقات میں پیش رفت کے لیے "تین  مشترکہ اقدار - باہمی احترام، باہمی شعور اور باہمی مفاد - کی رہنمائی لینی چاہیے۔" انہوں نے کہا کہ اختلافات کو تنازعات یا ٹکراؤ میں تبدیل نہیں ہونے دینا چاہیے۔