نئی دہلی، 17 اگست (یو این آئی) وزیرِ اعظم نریندر مودی نے کانگریس کا نام لئے بغیر اس پر بالواسطہ تنقید کرتے ہوئے اتوار کو کہا کہ جن لوگوں نے خود کو آئین کا علم بردار بنا رکھا ہے، انہی لوگوں نے کس طرح آئین کو پامال کیا ہے، یہ سن کر عوام دم بخود رہ جائیں گے، جبکہ ان کی حکومت پچھلی حکومتوں کی غلطیوں کو درست کرنے میں مصروف ہے۔وزیرِ اعظم مودی دارالحکومت میں 11 ہزار کروڑ روپے کی قومی اہمیت کے مختلف ہائی وے پروجیکٹس کا افتتاح کرنے کے بعد ایک اجتماع سے خطاب کر رہے تھے۔وزیرِ اعظم مودی نے کانگریس اور اس کے لیڈر راہل گاندھی کے بھارتیہ جنتا پارٹی حکومت پر آئین کی خلاف ورزی کے الزامات کا نام لئے بغیر سخت جواب دیا۔ انہوں نے کہا کہ سماجی انصاف اور آئین کی بات کرنے والے ہی بابا صاحب کی جذباتی وابستگی کو دھوکہ دیتے رہے ہیں۔انہوں نے کہا کہ یہ لوگ جو سر پر آئین رکھ کر ناچتے ہیں ، وہی آئین کو کس طرح کچلتے تھے،  بابا صاحب کی امنگوں کو کس طرح دھوکہ دیتے تھے، میں آج وہ سچائی آپ کے سامنے رکھنے جا رہا ہوں۔ میں کہتا ہوں آپ یہ سن کر ششدر ہو جائیں گے۔وزیر اعظم نے کہا کہ دہلی میں صفائی ملازمین کے لئے ایسے قوانین بنائے گئے تھے کہ اگر کوئی صفائی ملازم ایک دن بھی غیر حاضر ہوا  تو اسے ایک ماہ کے لئے جیل میں ڈال دیا جاتا تھا۔ انہوں نے کہا کہ ان کی حکومت نے ایسے قوانین کو ختم کیا ہے۔وزیر اعظم نے کہا کہ پچھلی حکومتوں نے دہلی کو کھائی میں دھکیل دیا تھا  اور دہلی کو اس  سے نکالنے اور ترقی کی راہ پر آگے بڑھانے کا مشکل کام بھارتیہ جنتا پارٹی کی حکومت کرے گی۔

 انہوں نے کہا کہ دہلی اور آس پاس کے تمام ریاستوں میں بی جے پی کی حکومت ہے، اس لئے این سی آر کی ترقی ہمارا فرض ہے۔مودی نے کہا کہ عوام ہی ہماری  ہائی کمان  ہے۔ ہمارا عزم ہے کہ عوام کی زندگی بہتر بنائیں۔ انہوں نے کہا کہ ہریانہ میں نوجوانوں کو شفافیت کے ساتھ نوکریاں دی جا رہی ہیں، دہلی میں جھگی نشینوں کو پکے گھر، گیس کنکشن اور بجلی فراہم کی جا رہی ہے۔ گزشتہ 11 برسوں میں ملک میں ریکارڈ سڑکیں تعمیر ہوئیں، ریلوے اسٹیشنوں کی جدید کاری ہوئی اور دیگر سہولیات میں توسیع کی گئی ہے۔ ہنڈن (غازی آباد) سے مختلف شہروں کے لئے پروازیں شروع کی گئی ہیں اور نوئیڈا ایئرپورٹ بھی جلد ہی فعال ہونے والا ہے۔انہوں نے کہا کہ پچھلی حکومتوں کے وقت دہلی میں منصوبے تو بہت بنے لیکن عمل نہیں ہوا۔ عوام نے بی جے پی کو موقع دیا تو کام شروع ہوا اور اب ہر شعبے میں ترقی کا کام جاری ہے۔ دوارکا ایکسپریس وے جیسی بڑی اسکیمیں شروع ہو چکی ہیں اور ان کی حکومت نے بنیادی ڈھانچے کے بجٹ میں خاطر خواہ  اضافہ کیا ہے۔وزیر اعظم نے آج جن پروجیکٹس کا افتتاح کیا ان میں دوارکا ایکسپریس وے کا دہلی سیکشن اور اربن ایکسٹینشن روڈ-2 بھی شامل ہیں۔اس موقع پرٹرانسپورٹ اور ہائی ویز کے مرکزی وزیرنتن گڈکری، ریاستی وزیر  اجے ٹمٹا،  وزیرِ اعلیٰ ریکھا گپتا، ہریانہ کے وزیر اعلیٰ نایب سنگھ سینی، دہلی حکومت کے وزراء، ارکانِ پارلیمنٹ اور دیگر معزز شخصیات موجود تھیں۔