نئی دہلی، 22 جولائی (یو این آئی) ہندوستانی فضائیہ کے بعد اب فوج کو بھی جدید ترین اپاچی جنگی ہیلی کاپٹروں کی طاقت دیتے ہوئے تین اپاچی ہیلی کاپٹروں کی پہلی کھیپ منگل کے روز فضائیہ کے ہنڈن ایئر بیس پر اتری۔فوج نے سوشل میڈیا پر پوسٹ میں یہ اطلاع دی اور اسے ایک تاریخی لمحہ قرار دیا۔ فوج نے ان کثیر مقاصد کے جنگی ہیلی کاپٹروں کی سپلائی کی تصویر شیئر کرتے ہوئے کہا کہ اس کی ایئر ونگ کے لیے تین اپاچی ہیلی کاپٹروں کی پہلی کھیپ ہنڈن ایئر بیس پہنچ گئی ہے۔ پوسٹ میں کہا گیا ہے کہ ان جدید ترین ہیلی کاپٹروں سے فوج کی  فائرنگ کی طاقت میں اضافہ ہوگا۔دنیا کی سب سے بڑی ایرو اسپیس کمپنیوں میں سے ایک امریکہ کی بوئنگ کمپنی نے وزارت دفاع کے ساتھ معاہدے کے تحت اپاچی ہیلی کاپٹروں  کی یہ پہلی کھیپ بھیجی ہے۔ ان ہیلی کاپٹروں کی سپلائی گزشتہ سال شروع ہونی تھی لیکن اس میں ایک سال کی تاخیر ہوئی۔ یہ ہیلی کاپٹر جودھ پور میں تعینات کیے جانے کا امکان ہے۔ فضائیہ کے پاس پہلے ہی 22 اپاچی ہیلی کاپٹر ہیں۔ فضائیہ کو ان ہیلی کاپٹروں سے لیس کرنے کے بعد وزارت دفاع نے بوئنگ کے ساتھ 4168 کروڑ روپے کی لاگت سے فوج کے لیے چھ اپاچی ہیلی کاپٹر خریدنے کا معاہدہ کیا تھا۔